Die Grafschaft Bentheim im Unterricht


Plattdeutsche Texte

   

Darteen Wilsemer up 'n Pad noa Emmelkaump

Darteen Wilsemer Buren güngen is moal met mekaar noa de Emmelkaumper Karmse. Ear at se futtgüngen, täilde ear ierst eene, of se d'r wal alle wa'n. Men het was best vür mekaar, doar schäilde (fehlte) gineene. Se wa'n net darteen Maunlö.

Dür 't Wagenspür göngen se achter mekaar liek up Emmelkaump an en wa'n al hoast ien 'n „Ballast", ien Öaveringen. Du schöat up 't Moal eene van de Buren wat ien 't Sinn. He rööp: „Wocht' is ääm! Wi bint nu gauw ien Emmelkaump. At wi temett up de Karmse bint, könn wi ons häinig verlöaren kriegen. Loat wi ons doch vür de Wissigheet noch ääm wier tellen. Wat sull dat naa' (furchtbar) wään, at wi unnerweggens eene verlöaren kregen hadd'n."

En du wööd d'r täilt. Den iersten köimp bis twölm. Du begüint den tweeden. Em göing dat net soa. Elk was moal an Büürt met dat Tellen. Men het güing ear alle allees. Se täilden ... negen, tiene, elm, twölm..., en dann was 't gebüürt. Gineene had doar an dacht, sik sölm met te tellen. Wat 'n Spill! Se wa'n met darteen futtgoahn en nu wa'n se bloß noch met 'n twölm. Nümms (niemand) kunn sik begriepen, wo of dat kunn. Hadd'n se unnerweggens eene verlöaren kregen of hadd'n se verkiert täilt? Se kunn' met 'n besten Willen ok nich noagoahn, well of d'r nich mehr bi was.

Gelükkig was d'r eene bi, dee Roat wüss, wo se doar nu met anmuss'n. (Anners hadd'n se d'r mischien vandage noch stoahn te prakkesieren.) Of dat de kloke Jan was, dat weet ik nich, men dissen Buur sää: „ Kiekt is, hier ligg nen mooien frischen Koh-Flott. Nu loat wi is alle noa mekaar onse Nöse doar ien stippen."

Dat kunn gebüren. Doar wa'n se foart met eens. Elk stöck siene Nöse d'r ien. Darteen kläine Kuhlen blewen dütlik ien den Koh-Flott achter, en elk had 'n Bettken van de Kohschiete an de Nöse.

Men de Wilsemer wa'n heel bliede, dat se alle darteen noch bi mekaar wa'n en güngen met Plesier verdan noa de Karmse.

                                        Upschreeven van Janette Boerrigter