Die Grafschaft Bentheim im Unterricht


Plattdeutsche Texte

 

Storm

Hu, wat suust dat dör de Stroaten!
Hu, wat suust dat ower’n Diek!
Wat een Wäihen, wat een Stoaten!
Wind bugg krumm, wat anders liek.
Dören rappelt,
Fenster klappert,
O, wat flegt de gellen Blaa!
Wiethen ower’t Land se fleget,
Töge van de Bäöme fleget,
Binnen hault sick alle raa.

Hör Y an de Ruten trummeln
Regendroppen dick en swoar?
Hagel en dorby noch Grummeln!
Wat een Weer, wat för Gefoahr!
Wolken düster,
O, wat biester
Wäiht’t üm Gewel to en Dack!
O, wat störmt dat an de Ruten!
Lö, de underwegs noch buten,
Rett’t sick vör dat ungemack. -

Endliks, endliks! Storm wot minder.
Regen, Hagel hört weer up,
Aulers bliede bint en Kinder,
All’s weer ut de Hööke krupp.
Buten luren
Börgers, Buren:
All’s is gut goahn, nix kapott!
Stäil up stoaht noch Bööken, Dannen,
En up’t Dack noch alle Pannen!
Dank di, lewe Heregott!

                          Carl van der Linde