Die Grafschaft Bentheim im Unterricht


Plattdeutsche Texte

    

Water uut de Waund

Du Berndken 1946 noa de Schole häinköimp, kunn he soa recht noch gin Woart Hochdütsch. Foart den tweeden Dag köimp dat Frollein, de Lehrerin, bi em, as he doar soa ien de ierste Baunke satt.

Se bekeek sick siene schmearigen Pöötkes en segg: „Bernhard, mit diesen schwarzen Händen kannst du doch nicht schreiben! Geh mal und wasch dir die Hände!“

Berndken kreeg ’n roat Köppken. He was heel benauwt, he harre niks verstoahn. “Wat seggs du?”, fröög he.

“Du sollst dir die Hände waschen, Bernhard!”, segg dat Frollein en wiesde up siene Hanne.

-„Wat hess du seggt?“

Alle Kinner keken noa Berndken en alle lachten em wat uut. Dat Frollein lachte ok. Dann nömm se em bi de Haund, güng met em noa de Düre en möök se löss. – „So, Marsch, Hände waschen, aber flott!“ En dann gaff se Berndken nen Schupp, dat he noa den Flur häin flöag.

Nu begreep de Junge ierst, wat se woll. Och, soa was dat! He sull sik de Hanne waschen. ... ...

Et duurde nich lange, du stöind Berndken wier ien de Klasse. Alle Kinner keken em an. Dat Frollein keek em ok an. „Fertig?“, fröög se.

-„Nää, doar is gin Water!“

-„Da ist kein Wasser?”

-„Nää, doar is gin Water!“

-„Aber Junge, da ist doch wohl Wasser im Flur!”

-„Nää, is gin Water!“

-„Ach was, das gibt’s doch nicht. Komm mal mit!“, segg se en schuw Berndken vür sik häin ien ’n Flur. Dann segg se: „Hier ist doch Wasser, du Schäfchen!“

-„Woar dann?“

-„Da!“

-„Woar? Ik seh gin Water!“

-„Aber Bernhard, hiiiier!”

Dann geht se bi soa ’n blaunk Dinge, dat doar uut de Müre kick en dräiht doar an.

En doar koump ... Water … uut de Waund!

Berndken stöind en keek! Nee, wat ’t nich alle gaff ien de Schole! Soa wat harre he ja noch nooit sehn! –

Berndken haalde deep Luft, un dann sä he: „ Mensch noch moal! Blixikater! Doar bisse aber platt. Water uut de Waund! Soa wat giff’t ja gar nich. Bi ons ien ’t Wilsemer Brook koump ’t Water aait uut de Poumpe!“


 
(Noa ’n Vertellsel uut: Der Grafschafter – Zwischen Burg und Bohrturm, August 1978)